用 Nikon 影結婚過程的經驗分享 (新增 4c 部份)


見有版友分享影 function 之經驗, 而冬季將至, 又係結婚旺季啦, 身為攝影友的你, 少不免有親朋好友邀請你幫手影結婚相, 又或者一時技癢, 自動請纓幫手!

唯遲遲未見有版友分享影結婚當日之心得, 只好自罰抄寫四千字, 分享個人從網上收集的心得, 再加上個人六次當正 / 副手經驗而成.

事先聲明 : 如無此經驗者, 或裝備不足者, 切忌大膽當主力影手, 話哂一生人一次之大事, 無 NG 無重拍, 影得好會得到片刻間的讚美, 影得唔好, 卻會換來幾十年的埋怨與閒話, 小心, 小心.

器材篇
相機 : 可以的話, 有後備機較好, 相機好識揀時候罷工的, 記住帶後備電去

閃光燈 : SB-800. 一至三支不等 (技術好才用 CLS 好了), 同上, 有後備機較好, SB-800 應裝上 SD-800 (第五粒電池盒) 加快回電. 有 SD-8a 更佳

電池以叉電為佳, 因為回電比鹼性電快, 不過考慮全日行程一般要用 4 至 6 排電去計 (20 至 30 粒電), 鹼性電都係少不了. 唔怕重的話可以帶埋叉機出去, 不過又要影相又要走來走去叉電好麻煩, 個人偏好先叉電, 無哂就由鹼性電接力.

當回電超過 8~10 秒左右就換電, 唔係好易錯失珍貴鏡頭.

鏡頭 : 中、短焦矩變焦鏡為主, 如入門的 18-70, 28-85, 講究一點的 12-24, 17-35, 17-55, 28-70, 小黑; 定焦鏡方面, 35/2, 50mm, 60mm, 85mm 都是熱門選擇

Digital wallet : 這個不用說了吧, 一般影全日都會過千幅相的, 帶兩、三張 CF / SD卡方便輪番使用

手提電腦 : 隨意, 個人經驗係有的話, 可以偷閒俾大家即時睇相, 會令大家好開心, 尤其是伴娘 / 姊妹團會好雀躍, 單身的男士要注意了……


事前準備篇
事前先與新人討論工作程序, 一般會外聘婚禮攝影師幫忙, 一定要熟知當日流程, 如果新人有流程表的話, 緊記看清楚每一個細節, 有唔明就要事前問好, 咪諗住到時至問, 因為到時根本無人有時間理你.


案發當日(!?)
1, 一般都由男家開始影相, 因為要拍攝兄弟佈置花車的片斷, 可以影到唔少兄弟團雞手鴨腳之鏡頭, 及後videoman會幫新郎和兄弟團做訪問, 呢個時候係捕足新郎既興奮又緊張o既神情之大好時機. 出動小黑之類的長鏡可以得到自然的表情, 最後當然係新郎同兄弟團合照, 想搞氣氛的話, 不妨叫兄弟排排企係後邊做背景板, 做出超人戰隊之類o既動作襯托新郎.

2, 到達女家, 時間許可的話, 先上去女家, 爭取拍攝新娘set頭、化粧的過程, 並影下未穿上的婚紗、中式裙褂、首飾、繡花鞋之類鏡頭; 注意, 先同新娘同姊妹商量好才進入新娘房!!!

另外, 女家家人和親友, 以及姊妹團準備玩新郎所用的道具亦是不應錯過的鏡頭.

拍攝新郎同兄弟團上樓拍門、開門利事的講價還價、姊妹團接過開門利事、玩新郎的遊戲花絮, 都係近距離搶拍多, 當副手的注意自己別擋著主力攝影師. 呢幾個環節個個都七情上面, 姊妹團開價之肉緊, 兄弟團的耍賴, 新郎同兄弟團被玩時的尷尬和惹笑, 都係不容錯失的時刻.

新郎入屋後就是拍攝接新娘一刻, 一般會由新娘之父親帶領近娘出來, 親手將個女兒交俾新郎, 記住要影到新娘、新娘父親以及新郎三個人, 六隻手疊好的一刻, 然後都會新郎親吻新娘的時候, 連拍吧, 因為通常兩個都會怕羞, 唔容易掌握親吻的時機, 小心連拍時閃光燈的火力是可足夠, 必要時近距離、大光圈、高 ISO (ISO400 左右) 節省耗電量.

然後係拜祖先同向外父外母、一眾長輩敬茶儀式, 以及女家為新娘送贈、載上金器的片刻, 叫一對新人同長輩以 “八”字跪/坐下, 以免後者被遮擋著, 而且要留意幫手遞茶的姊妹, 唔好俾佢破壞構圖同背景. 另外, 當主力而無大妗姐的話, 更要在斟茶時講出吉利說話, 如 “戴起金器, 大喜大喜” (詳見本文第 22 個留言, 由 RXX 兄所寫的吉利說話 - http://www.dchome.net/viewthread.php?ti ... pid3241040), 一般新手都會覺得大聲講此類庸俗說話而感到尷尬, 無奈長輩最愛此道, 當然啦, 有時候都有一些家庭未必受落, 睇主人家面色同親友反應而自行判斷吧.

在新人出門前, 先走到門外, 影低伴娘打開紅傘、灑米之類的鏡頭, 然後就係花車前的新人合照, 新娘跟家人、親友及姊妹團合照, 和新人加兄弟姊妹團跟花車的大合照...

由於香港是左邊上車的關係, 新人上車前, 你可以選擇左側車尾或由右側車窗影過去, 會有較佳的角度; 上車後, 請新人望向窗口, 甚至伸出窗口影特寫吧. 此時新人應該比較輕鬆下來, 表情會開始生動、開心一點. 留意他們的表情, 還會緊張的就要多提醒他們笑.

3, 到達男家, 影新人落車、進入男家的情景, 斟茶時間要注意的事項同女家時一樣, 禮成後都會係午餐時間, 一般會係男家於酒樓訂檯請大家食的, 請盡快食完然後返回男家, 因為呢個時候通常新娘會換完婚紗準備出門, 又係影set頭、化粧、飾物、高根鞋的時候啦.

有時, 午餐後, 新娘會先回女家, 完成 “三朝回門” 儀式才去註冊, 個人未試過此類情況, 有待其他版友補漏了. (有關三朝回門”儀式, 可參考本文第 40 個留言, 由 snoopy39 兄所提供之心得 - http://www.dchome.net/viewthread.php?ti ... pid3241380)

新人出發到註冊的地點, 少不了又係影上車落車、步行到註冊地點的鏡頭啦.

普遍地點都以室內為多 (唔計去 Disney / 海洋公園, 甚至潛水之類地方註冊), 分別是政府婚姻註冊處、教堂和酒店.

4a, 註冊地點是政府婚姻註冊處
一般行 ISO 200 ~ 400, 閃光燈打 bounce 或用反光卡.

新人會先親身辦理登記手續, 拍幾幅留念吧, 而且拍下結婚戒指放在盒內的特寫吧.

自先行進入註冊室, 拍攝新人及親友進入的情況, 然後是新人起立宣誓、交換戒指、揭頭紗、親親咀兒、新人簽字、証婚人簽字、註冊官簽字及頒發証書得鏡頭, 留意閃光燈回電速度!!

禮成後一般有五至十分鐘時間可以逗留在註冊室影相, 先拍新人跟証婚人、雙方家人合照吧, 跟著先請兄弟姊妹團離開註冊室, 於門外築成人牆以供拍攝. 到拋花球的時候, 留意距離, 小心鏡頭能否影到新娘拋花球的特寫和搶接/躲避花球的姊妹.

期後可在附近公園或寬闊的地方拍攝新人合照, 以及大合照, 一般次序是男家家人、女家家人、雙方家人、男/女方親戚、朋友、同事、兄弟團、姊妹團、兄弟姊妹團以及全體大合照. 注意, 除非場地所限而無路可退, 切忌以超廣角鏡頭影大合照, 如 12-24 等等, 因為超廣角鏡頭的誇張透視感會令後排以及邊位人士嚴重變形, 可以的話, 別用 24mm 以下的焦段, 當然場地所限的話, 12mm 都要拼著用了.

題外話一則, 作為攝影師, 追求美人美景是職責所在, 看到附近別家新娘、伴娘、姊姊等人漂亮的話, 應盡力抽空拍攝, 方為盡職的攝影師……

4b, 註冊地點是教堂
個人最怕教堂行禮, 因為程序動輒一小時以上, 而已無得打 bounce, 只可以直打或用反光卡, 比較麻煩, ISO 400 同 FV +1 都係比較常用的設定, 事前先試影幾幅測試一下吧.

一般來說, 兄弟姊妹團會先入教堂佈置, 影一些留念吧, 又或者可以用大光圈鏡頭影小品特寫, 因為收費的攝影師都不會拍攝此類特寫鏡頭的; 另外, 請問明教會有沒有禁區地帶, 一般來說講檯後方的祭壇都是不可踏足之地.

小心新人由室外走進教堂之時的大背光, 留意測光模式同 FV lock 之用處, 由於新人與花仔花女都在暗淡的教堂中走動, 要加快快門速度以得到清晰影像, 有 VR 鏡頭的話, 關掉吧, VR active 只會拖慢對焦速度. 留意新娘父親將女兒交到新郎手上的鏡頭.

另外, 由於教堂地方比較大, 通常唔係太方便走近講檯拍攝, 小黑之類中長焦距鏡會比較易於構圖. 至於交換戒指、簽字、揭頭紗、親親咀兒魏過程都與上述大同小異, 略過不提.

禮成後, 先讓新人跟神父/牧師、詩班合照, 總不能過橋抽板吧!? 新人不懂事的就要提提他們, 然後甚麼跟甚麼的大合照啦, 也是略過不提. 值得一提的是有超廣角鏡頭的話, 可以俯身由低處影新人跟教堂的合照, 魚眼鏡亦可, 其誇張透視感會相當有趣, 亦是收費攝影師都少拍的鏡頭.

4c, 註冊地點是酒店
今年起開始流行於婚姻註冊處、教堂以外之地方, 由律師執行註冊儀式, 一般都是於晚上婚宴前, 於所有賓客前進行, 攝影設定與下列的晚宴部份差不多, 不過, 由於註冊儀式要讓在場的賓客看見, 排位方面會跟註冊處、教堂的有點不同.

整個程序, 仍是新人宣誓、交換戒指、揭頭紗、親親咀兒. 不過一般會是新人於臺上面對面的站著, 律師於新人耳邊背誦誓詞, 新人跟著讀出, 貓紙不見了!! 換言之只有一個角色可供拍攝. 又, 由於要同時供 videoman 拍攝, 攝影師因此不能走得太近影相, 因此小黑之類中段變焦鏡頭會變得非常有用, 可以拍到新人與律師的場面, 又可以影下新人的個別特寫. 留意拍攝距離遠了, SB-800 之火力射程, 若果光線不足的話, 就要用上 ISO 400, 甚至 ISO 640、800 等了, 否則可能令 SB-800 未能完全回電, 相片可能會一幅曝光正確, 兩幅曝光不足之類的情況出現!!

同樣, 整個新人儀式的座位編排都會和註冊處不一樣, 有別於註冊處的 "2、1、2" 坐法, 為方便拍攝和讓在場賓客看見, 會以 "1、4 (2)" 方法編排, 如下圖

(男家) (女家)
(母親) (母親)
新郎 新娘 男家 女家
父親 父親
--------------------------
律師 | |
--------------------------
與先前宣誓情況相同, 仍然是以小黑之類鏡頭拍攝為多, 有兩個機身的話, 可以用廣角鏡影一個全檯的鏡頭, 只有一個機身的話, 就要快速換鏡啦.


5, 晚宴 - 開席之前
仍是拍攝兄弟姊妹佈置場地、門外掛畫、親友到賀、向長輩敬茶、新人切蛋糕和合巹交杯等鏡頭, 當中最麻煩的要算是親友大合照啦, 最好叫新人於男女家各找一至兩個熟悉家中親友的人幫手, 打斜企, 笑, 放低手袋, 坐低的要合上雙腳、留意有無人被遮擋等都是影大合照要留意的地方. 遇上大合照要等這個等那個的情況, 先叫他們企定影兩幅, 講聲之後再補拍, 然後影完就打發走他們, 否則十點都開唔到席~~~

影大合照一般都係 24mm 或以上焦距, 相兩邊留空位避免鏡頭桶狀變形, 注意水平, 因為假天花一斜掉就好礙眼, 事後 photoshop 有的你受!! 白平衡方面, 一般用 AWB 都可, SB-800 可以用附送橙色的 gel, 以求貼近現場偏暖的光源, 行 iTTL或 AA mode M mode, 加 0.3 ~ 0.7 FV. 相機用 ISO 400, 光圈 f5.6, 快門 1/30 ~ 1/60, 視情況而改變, 以求多吸收背景光, 避免成像背景變得黑暗. 拍攝時連拍兩幅, 閃光燈回電唔切就講少少廢話拖延時間, 如 “企埋小小” 等等, 唔使講 “一二三~~ 笑” 啦, 一句 “預備” 就連打兩幅, 唔係講到口臭都未開席.

另外, 攝影師一般唔會有太多時間係晚宴進食, 把握剛抵達之時好好填飽自己.

又, 再次喋喋不休地呼籲, 看到現場有任何漂亮女性, 包括新人的親屬、朋友、同事以至酒店的侍應生, 應盡力抽空拍攝, 方為盡職的攝影師……

6, 晚宴 - 開席
一般是以播放新人的 slide show 開始的, 注意雙方父母表情, 唔多唔少都會眼濕濕的, 之後是新人進場, 有準備花炮的話, 都是以連拍搶拍吧. 跟著是例行新郎新娘發表致謝詞, 通常新娘都會例牌喊哂口, 照影好啦.

新人就座後, 提提新人互相餵食乳豬; 中段敬酒時拍攝新人主家席互相祝酒, 然後是向賓客敬酒花絮, 超廣角鏡頭或魚眼鏡亦可. 有玩遊戲的話, 就盡量拍攝被玩者的神情和四周賓客興奮的表情, 不過近年已經少見玩新人之項目了 (感恩啊!!). 最後, 就是送客場面啦.


結論
(I) 做得攝影師, 記住你係大晒的, 有路人入鏡就即管開聲請走佢, 尤其是唔少 DC 友走前攝位影相, 立即請走他們吧.
(II) 記住經常提醒叫人笑, 影過的就知道新人大都是木口木面的多
(III) 除例行拍攝鏡頭外, 多影 snapshot, 自己唔會悶之餘, 新人又有驚喜, 皆大歡喜
(IV) 小心室內打 bounce 時, 天花板上有金屬路軌, 吊燈, 反光物料等會出現不能控制的反光, 遇上這類天花板還是直打或者用反光板.
(V) ISO 唔怕高, 因為這是紀錄相, 唔係唯美相, 影到就可以了
(VI) 最後是……………………… 無必要都唔好應承人幫手影相, 這個最重要!!!



Remarks : 嚴禁無斷轉載!!

資料來源:CDHome.net 數碼天地論壇
http://www.dchome.net/viewthread.php?ti ... a=page%3D1