100公里毅行12個極想放棄、感動、窩心位
:
*
20/11/2009起步天,234、勤到場打氣,勤贊助早餐陪行,234忙忙碌碌拍攝連下半場工作,沿路北風吹,天氣晴朗,風景如畫,6時後便到北潭凹會合支援老友234,238,虎,好美味义油雞少飯多薑蓉,飯暖暖,加上一杯熱茶,好滿足,有番氣力.隨便梳洗預備上山,238給我們一支面霜,塗上面霜,唔怕行完有皺紋,好正!234留後等友隊,238,虎陪行支持。
*
寒冷天氣警報,山上風大行唔旭,企唔穩, 行完可恨雞公山,到山腳,路不平坦,腳踝骨開始疲勞,情緒開始低落,背囊好重,此時成哥唔話得,幫cannie揹起背包,虎哥就揹起我背包,還有87公里….點去完成?!
“226..226我想剪帶,頭痛,腳痛呀~~連左肺都好痛~~”
“吓!你個左肺點會痛ka”
“……….”
*
”阿虎,你可以行快d,係前面等我就可以,我行得好慢,你揹著2個背囊好重好辛苦,我行得…好慢…”
“yip慢慢行,唔好放棄,你要行到終點,知唔知呀!,背囊我同你揹,慢慢就得,唔好放棄!”
*
沿途訊息送到,橕到企嶺下位置,翻開訊息看:有朋友、老友留言支持鼓勵你,其中成嫂現在好努力煮嘢食給隊友,加油!成哥遞上一杯薑茶,我的眼淚巳經流出來…(究竟係感動定不歸路,我都不分清)
*
終於橕到基維爾營,前面路口站著有個男仕,狀似等人,但身型似曾相識,
“你係咪234??”無反應,行前幾步,望真d,真係234,佢遞上熱薑茶驅寒,”飲杯先”鼻一酸,眼濕濕,差一點就..今次忍到,因為咁多人又多燈光睇住,好怪相.
*
巳經21/11/2009凌晨3:30,氣溫8-10度,接應到基維爾營226眾人,除我們8隊員外yuwong、燊哥、ivan、234、成哥分配好食物,熱水預備各人洗臉,抺身,起步日就是234正日生日,眾人補祝234生日,簡單唱首生日歌iii。誰人睡位置,車廂睡4人,戶外營睡4人,很快便入睡,未知睡了多久,出面風好大好冷,只隱約聽到ivan、234/燊哥說:好凍,好大風,有無膠袋,真係好凍..想叫佢地入營避風,不過佢地一定唔肯,其他支援只是閉目養神,怎會睡得到,差唔多6:30,快快營內換了衣服吃點早餐,影下相..精神奕奕.隊友測量山上溫度只有9.5-10度.
虎”226,我明天返工,只行到大埔道,你幫佢地揹背囊.”
226”好,我返屋企先,唔擰嘢,去大埔道接,幫佢地揹d背囊.”
虎“yip記著唔好放棄,要行到終點,我會行到大埔道,跟著226到.”
“你放心,你地唔會白揹,我承諾你地,跛著雙腳都要行到終點.”
由此刻開始,放棄念頭巳經無想,再想自己都睇唔起自己.
*
CP6金山郊野路徑,接應Denis行到金山路休憩地,大劉,Kenny,ykp,samson帶粥品,油器到場支援,記錄每人荃錦坳宵夜餐單,過重背包放係ykp車上,晚上送到山上,輕裝上路,226可以輕鬆一些.
*
有擔心針山、四方山.會拖著隊員長時間,好用力,上30級一小抖,有邊路行邊路,下山好大件事,用雙杖4個姿勢,360度轉身,正好專心下山時,擦身而過毅行參賽者,”0428!我係前面見過你,加油,努力,終點見”,”好,終點見!!”好快,影都唔見……(互不相識,一句鼓勵,一定橕到)
*
我以為星期六夜晚會行完,途上想想點同老爸講好..我行山,今晚都唔返,2日2夜喎,信唔信,哎,又黑面.
終於是這樣說”老爸,個山仲未行完,今晚唔返,熄燈la”
“咁你幾點返..”
“吓~~我都唔知,半夜呱,凌晨呱,就咁la”
掛線後,”由呢度(山上,未到沿鑛坳位置)行到大棠要幾耐?””點都要15小時!”嘩!這麼近那麼遠,暈低.
*
這兩天,天公造美,雖然天氣寒冷,視野清晰,身體好乾爽,慢慢行,由早到晚不同景色,香港好靚.
*
成功在望,終於到大帽山頂,行完髮夾彎到荃綿坳,夜色好靚,越行越濕寒,好凍~~長又斜石屎地,磨到腳底都痛,腰又硬,衣物單薄,226呼叫支援,禦寒衣物接應,234同成哥逆線上山,234遞上外套,暖在身,真好!最後cp8,cp9站北風呼呼吹陪行、支援:225、226、238、234、成哥、敬、denis、大劉、kenny、雀仔,ykp,Samson,燊哥,yuwong,熱情,細心,高速但低調,遞上熱飲,飯盒,煮麵,問各人有沒有什麼需要,巳經行了9成,整個人淨得軀殼。
*
終於到終點站,大家再次熱哄哄起來,拍攝,擺位沖線一刻都刻不容緩,完全忘記疲勞,無你地支援隊伍,還有由始至終2位隊長及其他5位戰友包容,我跟本無法走完,老實講句:是你地幫我完成100公里目標,走到沖線一刻成功、自豪,滿足感來自背後很多力量。有緣相聚,5年..10年或以後,大家互相包容、體諒,珍惜眼前友共情,不要咁容易放棄.
最後非常非常多謝來電支持、短訊朋友,義不容辭贊助人,出心出力支援隊伍,不露面都當係支持朋友,如有遺漏支援隊友,日誌不足之處,多多包涵。仲有sunny&小師妹.
2009年100公里毅行者0428D
大會時限:48小時完成
完成時間:47小時4分鐘
後記:當初234、cannie,成哥,samson,大劉一直說人生點都要行一次,值得回味,我只想著自己體力不足!辛苦!唔知為咩!係咪要退隊,比有毅行人仕?都熬過天氣酷熱,不要白流汗水!今天經過三日二夜勞役,毅行者的確有佢魅力,一年一度全港只有100隊參與,人生競賽,非常值得,回味一生!講開又講,差不多行上針山,發現有個同路人,佢就係大雄,斷症都有2級半腳傷,咁墮後,仲有恄下恄下,由開始上山下山,大家都叮噹馬頭,咁先無咁大壓力^-^哈哈哈,唔好意思爆左你出黎。仲有,邊個話提前一小時關閘,要快D趕到終站,忍痛快快快步行,攞命,去到又唔係,真抵打,快招供~~~~.如果下一年組織2隊港版劇”好老婆大聯盟1/2隊”,老婆拖晒出黎行,背後男人做支援隊長,每隊4人,成個山頭一定好熱鬧,成嫂做號召,勇敢d站出來!!相信,只會跛腳唔會斷腳,並無生命危險.7個月後等妳.哈哈哈!
㊣226行山隊討論區㊣®
登入
行行山 Facebook
萬年曆
問答集
搜尋
問226我們幾時到達終點，226說可能要明早上才可以到達，當時我記得說：有無攪錯，要捱多一晚，可唔可以到荃錦坳吃完飯唔休息，我要返屋企瞓覺，好彩得到cannie、yip好言相慰，才可以平服。 
